Liðsfélagar Paul Pogba og Zlatan Ibrahimovic hjá Manchester United draga þá niður í svaðið. Áðurnefndir leikmenn hafa ekki leikið vel upp á síðkastið og voru báðir gagnrýndir eftir 4:0-tap United gegn Chelsea á sunnudaginn.
Pogba var keyptur til United á 89 milljónir punda í sumar og Zlatan hefur ekki skorað í síðustu fimm úrvalsdeildarleikjum. Fyrrverandi enski landsliðsmaðurinn Danny Mills telur að United vanti fleiri frábæra leikmenn.
„Ég renndi yfir lið United og spurði mig hversu margir leikmenn þar kæmust í eitt af fimm bestu liðum heims. De Gea, Pogba og Zlatan gerðu það en ekki hinir leikmennirnir,“ sagði Mills í útvarpsþætti hjá BBC í gærkvöldi.
„Ég veit að Pogba hefur verið gagnrýndur mikið, enda er hann dýrasti leikmaður heims. Það getur verið erfitt að standa undir svona rosalegum væntingum. Þegar frábær leikmaður kemur inn í sæmilegt lið getur frábærari leikmaðurinn lent í vandræðum; enda er hann vanur að spila með betri mönnum,“ bætti Mills við.
„Pogba og Zlatan hafa lent í smá vandræðum vegna þess. Aðrir leikmenn eru ekki jafn góðir og þeir og hinir leikmennirnir draga þá niður.“