Leikmenn Leicester hreinsa af sér sakir

Enskir fjölmiðlar hafa gert að því skóna að nokkrir leikmenn Leicester City hafi þrýst á eigendur félagsins að reka Claudio Ranieri úr starfi knattspyrnustjóra félagsins, en hann var látinn taka pokann sinn á fimmtudaginn síðastliðinn.  

Þar hafa nöfn Kasper Schmeichel, Wes Morgan, Riyad Mahrez og Jamie Vardy til að mynda verið nefnd til sögunnar. Þessir leikmenn hafa vísað þessum ásökunum til föðurhúsanna á samfélagsmiðlum og í viðtölum við fjölmiðla um helgina. 

Schmeichel var fyrstur til þess að þvo hendur sínar af brottrekstri Ranieri með hjartnæmri kveðju á Instagram-síðu sinni á föstudagskvöldið og Wes Morgan og Riyad Mahrez fylgdu í fótspor danska markvarðarins í dag. Þá tók Vardy af allan vafa um að hann hefði haft eitthvað með brotthvarf Ranieri að gera með færslu sinni á Instagram-síðu sína síðdegis í dag. 

„Claudio trúði á hæfileika mína þegar fáir aðrir gerðu það og fyrir það á hann ævarandi þakkir skildar. Sögusagnir þess efnis að ég hafi átt þátt í að berjast fyrir því að hann yrði rekinn hafa ratað í fjölmiðla, en þær fregnir eru ekki á rökum reistar og eru særandi fyrir mig,“ sagði Vardy á Instagram-síðu sinni.  

• Blogga um frétt