Pogba er úr leik á næstunni

Paul Pogba, miðjumaður Manchester United og dýrasti knattspyrnumaður heims, þurfti að fara af velli vegna meiðsla í 1:0-sigri United gegn Rostov í Evrópudeildinni í gærkvöldi.

Pogba tognaði aftan í læri í byrjun síðari hálfleiks og búist er við að hann verði frá æfingum og keppni næstu þrjár vikurnar. Ljóst er að hann mun missa af leik United og Middlesbrough í ensku úrvalsdeildinni á sunnudag. Þá mun hann að öllum líkindum missa af landsleikjum Frakka við Lúxemborg og Spán síðar í mánuðinum.

Pogba hefur spilað 41 leik með United á tímabilinu, skorað sjö mörk og lagt upp fimm. Daley Blind fór einnig af velli, að því er virtist vegna höfuðhöggs, en ekki hafa borist fréttir af líðan hans.

• Blogga um frétt