Manchester United er sagt vilja gera nýjan fimm ára samning við portúgalska knattspyrnustjórann José Mourinho.
Mourinho er sagður reiðubúinn til að skrifa undir nýjan samning en hann tók við Manchester-liðinu fyrir síðustu leiktíð og gerði þá þriggja ára samning.
Geri Mourinho nýjan fimm ára samning tryggir það honum 65 milljónir punda sem jafngildir 9 milljörðum króna. Mourinho er hæst launaði stjórinn í ensku úrvalsdeildinni í dag ásamt Pep Guardiola, stjóra Manchester City, en vikulaun þeirra nema 250 þúsund pundum, 35 milljónum króna.
Undir stjórn Mourinho vann Manchester United Evrópudeildina í fyrra og náði þar með að vinna sér keppnisréttinn í riðlakeppni Meistaradeildarinnar en liðið hafnaði í 6. sæti í deildinni. United hefur byrjað tímabilið með látum og er í toppsæti deildarinnar ásamt grönnum sínum í Manchester City.