Chris Coleman er formlega tekinn við sem knattspyrnustjóri Sunderland og skrifaði undir tveggja og hálfs árs samning við félagið. Hann hætti með velska landsliðið á dögunum til þess að taka við Sunderland sem er í botnsæti ensku B-deildarinnar.
Ekkert hefur gengið hjá Sunderland á tímabilinu. Liðið féll úr ensku úrvalsdeildinni í fyrra en er á botni B-deildarinnar með 11 stig eftir 17 leiki.
Coleman hefur verið landsliðsþjálfari Wales í um fimm ár og náði eftirtektarverðum árangri á EM í Frakklandi á síðasta ári. Liðið komst þó ekki á HM í Rússlandi næsta sumar, en Coleman hefur áður verið knattspyrnustjóri Fulham, Real Sociedad og Coventry, svo eitthvað sé nefnt.