Felipe Massa hjá Ferrari vann keppnina um ráspólinn í Magny-Cours rétt í þessu. Lewis Hamilton hjá McLaren komst upp á milli Ferrariþóranna þar sem Kimi Räikkönen varð þriðji. Gírkassi bilaði í bíl Fernando Alonso í byrjun lokalotunnar og byrjar hann því með þungan bíl í 10. sæti.

Reykur stóð aftur úr bíl Alonso á fyrsta hring síðustu lotunnar svo hann varð að aka beint inn í bílskúr. Kom í ljós nógu alvarleg bilun til þess að skipta verður um gírkassa. Þar sem hann gat ekkert ekið telst hann tíundi í tímatökunum.

Það á ekki af heimsmeistaranum að ganga því hann varð að vera 55 mínútur af 60 á æfingu morgunsins í bílskúr meðan gert var við nema í bremsukerfinu í framanverðum McLarenbílnum.

„Þetta var það versta sem gat gerst því maður getur þó hagrætt bensínhleðslunni miðað við aðstæður lendi maður utan fyrstu tíu,“ sagði Alonso við spænska sjónvarpsstöð eftir tímatökuna.

Hamilton tókst ekki að hrista tímtökuhrollinn úr McLaren sem ekki hefur verið á ráspól í Magny-Cours frá því Mika Häkkinen sat þar árið 1998. Aðeins munaði sekúndubroti á þeim Massa. Räikkönen ætlar og seint að ganga að komast á fremstu rásröð í ár, en þar hefur hann setið aðeins einu sinni í átta mótum.

Óhappið í Montreal háði ekki Robert Kubica því hann náði sínum besta árangri í ár í tímatökum með fjórða sætinu. Giancarlo Fisichella og Heikki Kovalainen undirstrikuðu framfarir hjá Renault með fimmta og sjötta sæti.

Ralf Schumacher átti afmæli í dag og hélt upp á hann með besta árangri sínum í tímatökum í ár, þó aðeins næði hann 11. sæti. Tapaði hann sem endranær fyrir liðsfélaga sínum Jarno Trulli sem varð áttundi eftir harða keppni við Nick Heidfeld á BMW og Íslandsfarann Nico Rosberg á Williams.

Ekki byrjar verulega uppfærður Hondabíll vel því Jenso Button og Rubens Barrichello komust ekki í lokalotuna. Button varð tólfti og Barrichello þrettándi. David Coulthard gat ekkert ekið í annarri lotu, fór beint inn í skúr vegna gírkassabilunar. Endingartraust Red Bull bílsins ætlar því seint að lagast.

Í fimmta sinn á árinu, þarf af þriðja mótið í röð, komst Alexander Wurz hjá Williams ekki upp úr fyrstu lotu. Í fyrsta sinn frá í Mónakó varð Super Aguri fyrir því að komast ekki í aðra lotu.

Niðurstaða tímatökunnar varð annars sem hér segir:

Tímatakan í Magny-Cours			Lota 1			Lota 2			Lota 3
Röð	Ökuþór	Lið	Röð	Tími	Hri.	Röð	Tími	Hri.	Röð	Tími	Hri.
1.	Massa	Ferrari	3.	1:15,303	3	2.	1:14,822	3	1.	1:15,034	12
2.	Hamilton	McLaren	1.	1:14,805	3	1.	1:14,795	3	2.	1:15,104	12
3.	Räikkönen	Ferrari	2.	1:14,872	3	3.	1:14,828	3	3.	1:15,257	13
4.	Kubica	BMW	8.	1:15,778	7	4.	1:15,066	3	4.	1:15,493	12
5.	Fisichella	Renault	12.	1:16,047	7	7.	1:15,227	6	5.	1:15,674	12
6.	Kovalainen	Renault	5.	1:15,524	7	8.	1:15,272	6	6.	1:15,826	12
7.	Heidfeld	BMW	9.	1:15,783	4	6.	1:15,149	7	7.	1:15,900	12
8.	Trulli	Toyota	15.	1:16,118	5	10.	1:15,379	6	8.	1:15,935	12
9.	Rosberg	Williams	13.	1:16,092	7	9.	1:15,331	6	9.	1:16,328	12
10.	Alonso	McLaren	4.	1:15,322	3	5.	1:15,084	3	10.	Enginn tími	1
11.	R.Schumacher	Toyota	7.	1:15,760	6	11.	1:15,534	6
12.	Button	Honda	14.	1:16,113	6	12.	1:15,584	6
13.	Barrichello	Honda	16.	1:16,140	6	13.	1:15,761	6
14.	Webber	Red Bull	6.	1:15,746	6	14.	1:15,806	5
15.	Speed	Toro Rosso	11.	1:15,980	6	15.	1:16,049	6
16.	Coulthard	Red Bull	10.	1:15,915	7	16.	Enginn tími	2
17.	Liuzzi	Toro Rosso	17.	1:16,142	6
18.	Wurz	Williams	18.	1:16,241	7
19.	Sato	Super Aguri	19.	1:16,244	6
20.	Davidson	Super Aguri	20.	1:16,366	5
21.	Albers	Spyker	21.	1:17,826	6
22.	Sutil	Spyker	22.	1:17,915	5