Vonir Daniel Ricciardo hjá Red Bull um að endurheimta annað sætið í ástralska kappkastrinum fóru út um þúfur í morgun.
Það var niðurstaða áfrýjunardómstóls Alþjóða akstursíþróttasambandsins (FIA) sem tók fyrir áfrýjun á útskúfun hans úr kappakstrinum í Melbourne.
Málið snerist um bensínstraum í keppnisbíl hans en flæði bensíns til vélarinnar reyndist hvað eftir annað umfram leyfileg mörk. Varð liðið ekki við ítrekuðum ábendingum þess efnis frá dómurum mótsins meðan á kappakstrinum stóð.
Stjórnendur Red Bull sögðu flæðimælirinn í bíl Ricciardo hafa verið misvísandi og ónákvæman á æfingum og hefðu þeir því brúkað eigin mæli í staðinn í keppninni.
Fyrir réttinum í gær sótti lögmaður Mercedesliðsins það mjög hart að Red Bull yrði refsað og útskúfun Ricciardo staðfest. Auk þess voru fulltrúar Lotus, McLaren, Force India og Williams viðstaddir dómhaldið.