Daniel Ricciardo hjá Red Bull ók hraðast á fyrstu æfingu keppnishelgarinnar í Singapúr. Liðsfélagi hans Max Verstappen átti þriðja besta tímann, en á milli þeirra varð Sebastian Vettel hjá Ferrari.
Tíunda úr sekúndu munaði á Ricciardo og Vettel og einnig á þeim síðarnefnda og Verstappen.
Lewis Hamilton ók hraðast Mercedesmanna og setti fjórða besta tímann, en var 0,3 sekúndum lengur með hringinn en Verstappen.
Í sætum fimm til tíu urðu - í þessari röð - Sergio Perez á Force India, Valtteri Bottas á Mercedes, Kimi Räikkönen á Ferrari, Fernando Alonso á McLaren, Nico Hülkenberg á Renault og Daniil Kvyat á Toro Rosso.
Þess má geta að einungis 25 þúsundustu úr sekúndu munaði á þeim Räikkönen og Alonso og var sá síðarnefndi 1,2 sekúndum lengur í förum en Ricciardo.