Arnór Guðjohnsen, umboðsmaður og faðir Eiðs Smára Guðjohnsens, segir ekki útilokað að Eiður gangi til liðs við sænska úrvalsdeildarliðið Örebro. Eiður er sem kunnugt er laus allra mála frá AEK í Aþenu og hefur verið orðaður við ítölsku félögin Pescara og Chievo.
Arnór lék um skeið með Örebro og er talinn besti leikmaðurinn í sögu félagsins, en hann var nokkru eftir ferilinn þar valinn besti erlendi leikmaðurinn sem hefur spilað í sænsku úrvalsdeildinni.
„Hann var í Örebro þegar hann var strákur en hefur annars ekki verið í sambandi við nein lið á Norðurlöndum. Hann kostar hins vegar ekkert og því er ekki útilokað að hann myndi ganga til liðs við Örebro,“ segir Arnór í viðtali við sænska netmiðilinn KaptenBlod.se.
Arnór kveðst eiga góðar minningar frá tíma sínum í Örebro og hafi verið í sambandi við Lennart Sjögren, íþróttastjóra félagsins, af og til undanfarin ár.