Selfyssingurinn Viðar Örn Kjartansson var á skotskónum í norsku úrvalsdeildinni í knattspyrnu í kvöld, eins og svo oft áður. Viðar skoraði annað mark Vålerenga í 3:2-sigri liðsins á Stabæk og kom Óslóarliðinu yfir 2:1 með markinu á 36. mínútu. Viðar lék allan leikinn í kvöld.
Viðar Örn hefur nú skorað 15 mörk í 17 leikjum í norsku úrvalsdeildinni og er langmarkahæsti leikmaður deildarinnar. Næstu menn á eftir hafa skorað 9 mörk.
Vålerenga komst upp í 4. sæti norsku úrvalsdeildarinnar með sigrinum í kvöld og hefur liðið 30 stig að loknum 17 umferðum.