Eiður Smári Guðjohnsen er enn án félags eftir að samningur hans við Club Brugge rann út í sumar. Þar sem Eiður er samningslaus er hann ekki háður því að finna sér nýtt félag áður en félagaskiptaglugginn lokast um mánaðamótin en þessi 35 ára gamli markakóngur landsliðsins er ákveðinn í að halda áfram ferli sínum í vetur þótt óljóst sé hvar.
Á belgíska vefmiðlinum VoetbalNieuws eru indversk félög sögð á höttunum eftir Eiði, fyrir hina nýju indversku ofurdeild sem stendur yfir frá október fram til 20. desember. Þrjú eru sögð hafa rætt við Eið sem gæti fylgt á eftir mönnum á borð við Alessandro del Piero og David Trezeguet.