Gunnhildur Yrsa Jónsdóttir skoraði sitt fyrsta mark fyrir norska úrvalsdeildarfélagið Grand Bodö í 5:2-tapi gegn Stabæk í dag.
Gunnhildur jafnaði metin í 2:2 á 36. mínútu, en Stabæk skoraði þrjú mörk á síðustu tuttugu mínútunum og tryggði sér sigurinn.
Gunnhildur Yrsa gekk til liðs við Grand Bodö um síðustu mánaðarmót frá liði Arna-Björnar þar sem hún var síðustu tvö ár, en hún sleit krossband í hné í fyrrasumar og var lengi frá keppni í kjölfarið.
Grand Bodö er í botnsæti norsku deildarinnar með sjö stig eftir 16 leiki.