Argentínumaðurinn Lionel Messi er orðinn markahæsti leikmaður Meistaradeildar Evrópu í knattspyrnu frá upphafi eftir að hann gerði þrennu fyrir Barcelona gegn APOEL á Kýpur í kvöld en Börsungar unnu þar stórsigur, 4:0.
Fyrir leiknn var Messi jafn Raúl hinum spænska með 71 mark í keppninni og hann sló því metið með fyrsta marki sínu í leiknum. Mörkin hans eru nú orðin 74 samtals.
Þetta er annað stóra markametið sem Messi slær á nokkrum dögum en um helgina varð hann markahæsti leikmaður spænsku 1. deildarinnar frá upphafi.