Það hefur ekki blásið byrlega fyrir ítölsku risunum í AC Milan undanfarið. Liðið virðist fallið af þeim stalli sem það hafði sem stórveldi og enn syrti í álinn hjá þeim í gær.
Milan tapaði þá 3:1 fyrir Lazio á ólympíuleikvangnum í Rómarborg, og jafnaði um leið vafasamt félagsmet frá árinu 1941, en þetta er í fyrsta sinn síðan þá sem liðið vinnur ekki leik í ítölsku A-deildinni í janúarmánuði. Þá hefur liðið jafnframt tapað sjö leikjum í röð á heimavelli.
Milan situr í níunda sæti deildarinnar með 26 stig og hefur unnið sex leiki af tuttugu á tímabilinu. Núverandi stjóri þeirra er Filippo Inzaghi, ein af goðsögnum félagsins.