Dregið var í átta liða úrslit Meistaradeildar Evrópu rétt í þessu, en dregið var í höfuðstöðvum UEFA í Nyon í Sviss.
Manchester City, PSG, Wolfsburg, Benfica, Atletico Madrid, Real Madrid, Bayern München og Barcelona voru í pottinum í átta liða úrslitum Meistaradeildar Evrópu. Spánn á þrjá fulltrúa, Þýskaland tvo og England, Frakkland og Portúgal einn hver.
Liðin sem mætast í átta liða úrslitum Meistaradeildar Evrópu eru þessi:
Wolfsburg - Real Madrid
Bayern München - Benfica
Barcelona - Atletico Madrid
PSG - Manchester City
Aðeins þrjú af liðunum átta hafa hampað Evrópumeistaratitlinum. Real Madrid tíu sinnum, Bayern München fimm sinnum og Barcelona fimm sinnum.
Barcelona er ríkjandi meistari í Meistaradeild Evrópu og getur varið titil sinn í Mílanó í vor. Síðasta liðið til þess að bera sigur úr býtum í Evrópukeppni meistaraliða tvö ár í röð var AC Milan, en liðið varð meistari 1989 og 1990. Barcelona er í átta liða úrslitum Meistaradeildar Evrópu níunda árið í röð sem er met.
Leikirnir í átta liða úrslitunum fara fram 5./6. og 12./13. apríl en úrslitaleikurinn fer að þessu sinni fram í Mílanó hinn 28. maí.