Bayern München hóf titilvörnina sína í Þýskalandi á afar sterkan máta í dag með 6:0 stórsigri á Aroni Jóhannssyni og félögum í Werder Bremen. Leikið var í München.
Pólski framherjinn Robert Lewandowski skoraði þrennu í leiknum en Spánverjinn Xabi Alonso, Frakkinn Franck Ribery og fyrirliðinn Philipp Lahm skoruðu hin mörkin þrjú.
Aron Jóhannsson hóf leikinn sem fremsti maður hjá Bremen og var tekinn af leikvelli á 64. mínútu í stöðunni 3:0. Við það lagaðist spilamennska Bremen ekki neitt og Bæjarar gengu á lagið og bættu þremur mörkum við.
Leikurinn var eins og lokatölur gefa til kynna algjör einstefna meistaranna og ljóst að leið Arons og félaga er aðeins upp á við héðan í frá. Liðið lenti í 10. sæti þýsku Bundesligunnar á síðasta tímabili.