Landsliðsmaðurinn Hörður Björgvin Magnússon og félagar í Bristol City unnu sinn þriðja sigur í röð þegar liðið vann Leeds, 1:0, í kvöld í ensku B-deildinni. Hörður Björgvin var að vanda í hjarta varnar Bristol og lék allan leikinn en liðið hefur 17 stig í 5. sæti deildarinnar en aðeins þrjú stig eru í Norwich í 2. sætinu.
Ragnar Sigurðsson og félagar í Fulham gerðu 1:1 jafntefli við Nottingham Forest. Ragnar lék allan leikinn í miðverði hjá Fulham en liðið hefur ekki unnið núna í sex leikjum í röð. Fulham er í 12. sæti með 14 stig.
Aron Einar Gunnarsson var fjarri góðu gamni vegna meiðsla þegar Cardiff tapaði gegn Derby County heima, 2:0. Úrslitin smá skellur fyrir Cardiff þar sem Derby hafði aðeins skorað þrjú mörk á leiktíðinni til þessa en Nigel Pearson stjóri Derby var ekki á hliðarlínunni í kvöld og segja fréttir frá Englandi að hann sé væntanlega að hætta með liðið. Virðist fjarvera hans hafa svínvirkað í kvöld. Cardiff er í næstneðsta sæti deildarinnar, því 23. með 8 stig.
Landsliðsframherjinn Jón Daði Böðvarsson lék ekki í kvöld með Wolves vegna meiðsla eins og við sögðum frá í kvöld hér á mbl.is. Wolves tapaði gegn Wigan, 2:1, í Wigan sem skaust upp úr fallsæti en liðið var á botninum fyrir umferðina. Wolves hefur 15 stig í 11. sæti.
Þá lék Eggert Jónsson fyrstu 83. mínúturnar fyrir Fleetwood Town í 2:1 tapi gegn Bradford í ensku C-deildinni en liðið hefur 12 stig í 13. sæti. Bradford er í 3. sæti með 18 stig.