Lauren Holiday hefur gengist undir aðgerð þar sem heilaæxli var fjarlægt, en aðeins er mánuður síðan hún eignaðist sitt fyrsta barn. Holiday lagði knattspyrnuskó sína á hilluna í fyrra eftir að hafa gert garðinn frægan með landsliði Bandaríkjanna.
Hin 28 ára gamla Holiday var greind með heilaæxli í september þegar hún var gengin átta mánuði á leið, en hún ákvað að eiga barnið fyrst áður en hún tæklaði æxlið. Aðeins er rúmt ár síðan Holiday var í eldlínunni með Bandaríkjunum þegar liðið hampaði heimsmeistaratitlinum.
Holiday skoraði meðal annars í 5:2-sigri Bandaríkjanna gegn Japan í úrslitaleik HM í fyrra, en hún lagði skóna á hilluna í kjölfarið. Hún skoraði 24 mörk í 133 landsleikjum og vann meðal annars tvö gullverðlaun á Ólympíuleikum.