Birkir Bjarnason, leikmaður Basel í Sviss, verður eini íslenski leikmaðurinn í 8 liða úrslitum svissneska bikarsins í knattspyrnu, en lið hans vann Tuggen 4:1 í dag. Rúnar Már Sigurjónsson og félagar eru úr leik.
Birkir byrjaði á bekknum hjá Basel í dag en þurfti að koma inn á sem varamaður á 14. mínútu.
Basel vann góðan 4:1 sigur og er því komið áfram í 8 liða úrslitin en sömu sögu má þó ekki segja af Grasshopper.
Rúnar Már var í byrjunarliði Grasshopper en var skipt af velli á 61. mínútu. Grasshopper tapaði fyrir Young Boys með fimm mörkum gegn engu og er liðið því úr leik í bikarnum.