Neymar dýrastur en Ronaldo sjöundi

Samkvæmt nýrri rannsókn er það hvorki Cristiano Ronaldo né Lionel Messi sem er verðmætasti knattspyrnumaður Evrópu í dag, heldur félagi Messis hjá Barcelona, Neymar.

Neymar er virði 247 milljóna evra og einn tíu leikmanna sem leika í Evrópu, sem eru virði 100 milljóna evra eða meira. Þetta er niðurstaða rannsóknar á vegum CIES Football Observatory. Við mat á virði leikmanna er tekið tillit til ýmissa þátta, til dæmis varðandi frammistöðu leikmanna auk aldurs og tímalengdar samnings þeirra við núverandi félag.

Messi er næstverðmætastur, metinn á 170,5 milljónir evra, en athygli vekur að Ronaldo, handhafi gullknattarins og knattspyrnumaður ársins 2016 hjá FIFA, er sjöundi á listanum. Þessi 31 árs gamli Portúgali er metinn á 126,5 milljónir evra.

Þessir eru í efstu tíu sætunum:

1. Neymar, Barcelona - 246,8 m. evra
2. Lionel Messi, Barcelona - 170,5
3. Paul Pogba, Man. Utd - 155,3
4. Antoine Griezmann, Atlético Madrid - 150,4
5. Luis Suárez, Barcelona - 145,2
6. Harry Kane, Tottenham - 139,2
7. Cristiano Ronaldo, Real Madrid - 126,5
8. Paulo Dybala, Juventus - 113,8
9. Dele Alli, Tottenham - 110,5
10. Eden Hazard, Chelsea - 101,5

• Blogga um frétt