„Stundum segir maður heimskulega hluti“

Ítalski markvörðurinn Gianluigi Buffon upplýsti eftir 2:2-jafntefli Juventus gegn Atalanta í ítölsku A-deildinni í knattspynu í gærkvöldi að hann hefði gefið áhugavert loforð fyrir viðureign Juventus og Barcelona í Meistaradeildinni.

Juventus sló Barcelona út en liðið sigraði Spánarmeistarana 3:0 í fyrri leik liðanna í 8-liða úrslitum á Ítalíu áður en liðin gerðu markalaust jafntefli á Spáni.

„Ég lofaði liðsfélögum mínum því að ég myndi hætta knattspyrnu, leggja skóna á hilluna, ef við myndum ekki fá á okkur mark gegn Barcelona,“ sagði Buffon við ítalska fjölmiðla og bætti við að það væri frábært afrek að spila 180 mínútur gegn Barcelona án þess að fá á sig mark.

„Ég sagði forseta félagsins frá þessu eftir leikina og hann benti mér þá á að maður segir stundum heimskulega hluti! Hann er reynslumeiri en ég og veit þetta betur,“ bætti Buffon við en hann er með samning við Juventus til næsta árs.

• Blogga um frétt