Gunnhildur Yrsa Jónsdóttir, landsliðskona í fótbolta, skoraði fyrsta mark Vålerenga í 6:1-stórsigri liðsins gegn Medkila í áttundu umferð norsku efstu deildarinnar í fótbolta kvenna á Harstad Stadion, heimavelli, Medkila, í dag.
Markið í dag var annað mark Gunnhildar Yrsu fyrir Vålerenga í deildinni á yfirstandandi leiktíð. Vålerenga er í sjöunda sæti deildarinnar með ellefu stig eftir þennan sigur. Gunnhildur Yrsa kom til Vålerenga frá Stabæk fyrir þessa leiktíð.
Gunnhildur Yrsa er í leikmannahópi íslenska kvennalandsliðsins í fótbolta sem mætir Írlandi og Brasilíu í vináttulandsleikjum um miðjan júní, en leikirnir eru hluti af undirbúningi Íslands fyrir lokakeppni EM sem fram fer í Hollandi í júlí.
Ísland mætir Írum ytra fimmtudaginn 8. júní og íslenska liðið mætir síðan Brasilíu 13. júní á Laugardalsvelli. Leikurinn gegn Brasilíu er lokaleikur íslenska liðsins í undirbúningi fyrir lokakeppni EM.