Leikur Barcelona og Las Palmas í sjöundu umferð spænsku efstu deildarinnar í knattspyrnu karla verður leikinn fyrir luktum dyrum á Nou Camp, heimavelli Barcelona, klukkan 14.15 í dag.
Forráðamen Barcelona höfðu farið fram á það við spænska knattspyrnusambandið að fá að fresta leiknum vegna óláta í kringum fyrirhugaðar kosningar um sjálfstæði Katalóníu við Nou Camp.
Spænska knattspyrnusambandið hafnaði þessari beiðni Barcelona og ákvað þess í stað að leikurinn myndi fara fram án þess að stuðningsmönnum yrði hleypt inn á leikvanginn.
Miklar óeirðir hafa verið í Katalóníu í dag þar sem spænsk lögregluyfirvöld nota kylfur, táragas og byssur með gúmmíkúlum til þess að koma í veg fyrir kosningarnar um sjálfstæði Katalóníu.