Carlo Ancelotti ætlar að taka sér frí frá fótbolta eftir brottrekstur sem knattspyrnustjóri Bayern München á dögunum. Ítalinn var rekinn eftir 3:0-tap gegn PSG í Meistaradeild Evrópu.
Ancelotti hefur verið orðaður við AC Milan að undanförnu, en hann gerði liðið að tvöföldum Evrópumeistara á sínum tíma. Milan hefur farið illa af stað í ítölsku deildinni og er sæti Vincenzo Montella orðið heitt.
Ancelotti hefur hins vegar ekki áhuga á að vera stjóri Milan á næstunni. „Ég mun slaka á næstu tíu mánuði og ekki þjálfa annað lið," sagði hann við Sky Sport Italia. Hann vildi hins vegar ekki tjá sig beint um brottreksturinn frá Bayern.