Ólafur Kristjánsson sagði upp störfum hjá danska knattspyrnufélaginu Randers í dag eftir tæplega eitt og hálft ár við stjórnvölinn. Hann segir í samtali við Randers Amtsavis að margir hlutir hafi spilað inn í ákvörðunina.
„Ég hef hugsað um þetta í svolítinn tíma og ég ákvað að tala við Michael Gravgaard, yfirmann knattspyrnumála Randers í dag. Ég er þakklátur fyrir að hann hlustaði á mig og við fundum góða lausn fyrir alla.“
Hann segist ekki vilja vera í starfi bara til að vera í starfi.
„Ég var ekki lengur besta útgáfan af sjálfum mér og þá er erfitt að snúa við slæmu gengi. Ég vil ekki vera í starfi, bara til að vera í starfi og fá launin mín. Ég vil finna fyrir eldmóð og gera hlutina að alvöru. Mér fannst ég ekki geta það lengur,“ sagði Ólafur að lokum.