Hafa ekki gefist upp á Neymar

Spænski risinn Barcelona ætlar enn einu sinni að reyna fá knattspyrnumanninn Neymar aftur til félagsins frá PSG í Frakklandi. Neymar varð dýrasti leikmaður heims þegar PSG keypti hann frá Barcelona á 222 milljónir evra fyrir tveimur árum en hann hefur verið sterklega orðaður við endurkomu til Barcelona síðan í sumar.

Það virtist allt stefna í að Brasilíumaðurinn, sem hefur verið einn besti knattspyrnumaður heims undanfarin ár, myndi snúa aftur til Barcelona í sumar en viðræður félaganna runnu út í sandinn og hann varð áfram í Frakklandi. Neymar er 27 ára og hefur átt í vandræðu með meiðsli í vetur og þá hafa stuðningsmenn PSG átt erfitt með að taka hann aftur í sátt eftir daðrið við gömlu félagana í Barcelona í sumar.

Fréttamiðillinn Goal.com segir nú frá því að forráðamenn Barcelona eru að undirbúa nýtt tilboð í kappann. PSG vildi fá endurgreitt í sumar, þ.e. 222 milljónir evra, en á næsta ári verður Neymar árinu eldri og einu ári nær því að klára samning sinn hjá félaginu. Það gæti því verið að félagið verði tilbúið að samþykja lægra tilboð.

• 1 blogg um fréttina

Bloggað um fréttina

• Ómar Ragnarsson: Pele spáði að Neymar yrði sá besti.