Íþróttir | mbl | 10.4.2011 | 20:25 | Uppfært 8.2.2012 14:16

Stórt tap gegn Króatíu í fyrsta leik

Dennis Hedström hefur varið vel í marki Íslands og verður ekki sakaður um mörkin. mbl.is/Kristján Maack

Króatía og Ísland áttust við í fyrsta leik sínum í 2. deild heimsmeistaramótsins í íshokkí í Sportova-höllinni í Zagreb klukkan 18:15 að íslenskum tíma. Króatía vann stórsigur 9:0 og vann alla leikhlutana 3:0. Fylgst var með gangi mála í beinni textalýsingu hér á mbl.is.

Maður leiksins hjá Íslandi: Daniel Adel.

60. mín: Leik lokið. 9:0 stórsigur Króatíu er staðreynd. Getumunurinn á liðunum er mikill og endurspeglar þann mun sem er á 1. og 2. deild en Króatar féllu niður úr 1. deild í fyrra. Íslendingum gekk þó ágætlega að eiga við Króatana í stöðunni 6 á móti 6 en Króatar skoruðu 7 af 9 mörkum sínum þegar Íslendingar voru með mann út af í 2 mínútur.

54. mín: Staðan er 8:0 fyrir Króatíu. Íslendingar voru tveimur leikmönnum fleiri í um það bil mínútu en tókst ekki að nýta sér það. Markvörður Króata varði glæsilega frá Brynjari Þórðarsyni en heilt yfir hafa Íslendingar verið bitlausir þegar þeir hafa verið manni fleiri á ísnum.

50. mín: Mark! Staðan er 8:0 fyrir Króatíu. Sjötta mark Króata þegar þeir eru manni fleiri en Daniel Adel fékk sína aðra brottvísun í leiknum skömmu áður. Króatar kunna greinilega ýmislegt fyrir sér í „power play“ eins og það heitir á alþjóðlegu íshokkímáli.

47. mín: Mark! Staðan er 7:0 fyrir Króatíu. Fremur slysalegt mark þar sem Íslendingar töpuðu pökknum á miðjum vellinum og einn leikmaður Króata komst einn gegn Dennis og skoraði örugglega. Síðasti leikhlutinn hefur verið nokkuð rólegur fram að þessu.

40. mín: Staðan er 6:0 fyrir Króatíu fyrir síðasta leikhlutann. Íslendingar munu byrja síðasta leikhlutann manni fleiri því Króatía fékk brottvísun þegar 2 sekúndur voru eftir af leikhlutanum. Enn hallar þó á Ísland í brottvísunum. Ísland hefur fengið 7 slíkar en Króatía 5.

37. mín: Mark! Staðan er 6:0 fyrir Króatíu. Í fimmta skiptið í leiknum skora Króatar þegar Íslendingar eru með mann í kælingu. Að þessu sinni var það Daniel Adel en það var kannski tímaspursmál því hann hefur verið duglegur í því að láta Króatana finna fyrir sér.

33. mín: Staðan er 5:0 fyrir Króatíu. Einn leikmaður Króata var sendur út af í kælingu en Íslandi tókst ekki að skora á þeim 2 mínútum. Robin Hedström komst næst því en markvörður heimamanna varði ágætt skot hans. Robin hefur átt þrjú skot í leiknum.

30. mín: Staðan er 5:0 fyrir Króatíu þegar leikurinn er hálfnaður. Króatía missti mann af velli á 26. mínútu en Íslendingum tókst ekki að skapa sér almennilegt marktækifæri.

23. mín: Mark! Staðan er 5:0 fyrir Króatíu. Í fjórða skiptið í leiknum tekst Króatíu að nýta sér liðsmuninn og skora þegar Ísland er með mann utan vallar. Að þessu sinni var það Úlfar Andrésson.

22. mín: Mark! Staðan er 4:0 fyrir Króatíu. Heimamenn byrja með látum í öðrum leikhluta og skoruðu úr skyndisókn. Nú þurfa íslensku landsliðsmennirnir að ná áttum ef þessi leikur á ekki að enda í stórum tölum.

20. mín: Staðan er 3:0 fyrir Króatíu að loknum fyrsta leikhluta. Brottvísanirnar hafa reynst dýrar en Ísland hefur fengið fjórar slíkar en Króatía aðeins eina. Öll mörkin hafa komið þegar Íslendingar hafa verið með mann í refsingu. Í stöðunni 6 á móti 6 hefur Íslendingum tekist að halda Króötum í skefjum, meðal annars vegna frábærrar markvörslu hjá Dennis Hedström.

20. mín: Mark! Staðan er 3:0 fyrir Króatíu. Glæsilegt mark hjá heimamönnum en í þriðja skipti skora þeir þegar þeir eru manni fleiri á ísnum. Gauti Þormóðsson fékk brottvísun skömmu áður.

16. mín: Mark! Staðan er 2:0 fyrir Króatíu. Heimamenn skoruðu eftir þunga sókn en Jón Gíslason hafði fengið brottvísun í annað skipitið í fyrsta leikhluta. Á 14. mínútu fékk Robin Hedström gott færi eftir góðan undirbúning Emils Alengårds en skaut yfir markið. Skömmu áður en Króatar skoruðu annað markið varði Dennis frábærlega í markinu. Varði í tvígang í sömu sókninni.

13. mín: Staðan er 1:0 fyrir Króatíu. Gauti Þormóðsson var að fá besta færi Íslands til þessa en markvörður heimamanna varði frá honum af mjög stuttu færi.

12. mín: Mark! Staðan er 1:0 fyrir Króatíu. Birkir Árnason fylgdi í kjölfarið af Jóni í refsingu og Íslendingar voru því tveimur leikmönnum færri. Íslendingar stóðu það af sér en Króatar skoruðu örfáum sekúndum eftir að Jón kom inn á ísinn á ný.

10. mín: Staðan er 0:0. Dennis Hedström hefur sýnt hvers hann er megnuður í marki Íslands og er búinn að verja þrívegis frábærlega frá ágengum Króötum. Jón B. Gíslason var að fá fyrstu brottvísun Íslands í leiknum og nú kemur í ljós hvernig Íslandi gengur að verjast manni færri næstu 2 mínúturnar.

6. mín: Staðan er 0:0. Króatar voru að missa mann af velli fyrir gróft brot á Robin Hedström. Íslendingar eru því manni fleiri á ísnum næstu 2 mínúturnar.

2. mín: Staðan er 0:0. Króatar byrja af krafti og ætla sér að ná forystunni strax í upphafi eins og við var að búast. Olaf Ellert landsliðsþjálfari Íslands hefur ábyggilega komið þeim á óvart með því að nota allar fjórar línurnar á fyrstu tveimur mínútunum, þ.e.a.s allir leikmenn Íslands nema varamarkvörðurinn eru búnir að koma við sögu strax í upphafi leiks.

Klukkan 18:10. Nú er eins konar opnunarathöfn á ísnum og fulltrúar alþjóða íshokkísambandsins halda stutt ávörp. Þó um sé að ræða þriðja leikinn í dag þá er þetta eiginlega opnunarleikurinn þar sem heimamenn eiga í hlut.

Klukkan 17:45. Allir leikmenn í endanlegum 22 manna hópum liðanna eru leikfærir í kvöld. Ingvar Þór Jónsson er eins og áður fyrirliði íslands en Emil Alengård er orðinn varafyrirliði landsliðsins. Því hlutverki gegndi Jónas Breki Magnússon áður en hann tók sér frí frá íshokkí á þessu keppnistímabili.

Lið Íslands:

Markverðir:

Dennis Hedström

Ómar Skúlason

Varnarmenn:

Snorri Sigurbjörnsson

Birkir Árnason

Róbert Pálsson

Ingvar Þór Jónsson

Ingólfur Elíasson

Daniel Adel

Björn Jakobsson