Haustmót ÍSS fór fram um liðna helgi í Egilshöll. Mótið er fyrsta mót vetrarins á vegum Skautasambands Íslands.
Keppendur hafa aldrei verið fleiri eða alls 81. Keppni var hörð í flestum flokkum og gaman var að sjá framfarir hjá stúlkunum frá síðasta vetri enda var mikið lagt í æfingabúðir hér heima sem og erlendis yfir sumartímann. Skautafélagið Björninn var sigursæll á mótinu.
Í tveimur efstu flokkum mótsins, stúlknaflokk og unglingaflokk, er keppt eftir reglum Alþjóða Skautasambandsins (ISU).
Þuríður Björg Björgvinsdóttir, frá Skautafélaginu Birninum sigraði í unglingaflokki A (Junior A). Þuríður hlaut 89,92 stig, rúmlega 10 stigum hærra en næsta. Skor Þuríðar er mjög gott, og sérstaklega þegar litið er til að þetta er fyrsta mót hennar í heilt ár og sömuleiðis fyrsta mót vetrarins.
Þuríður var að koma aftur til keppni eftir að hafa verið frá í ár vegna meiðsla. Elísabet Ingibjörg Sævarsdóttir hafnaði í öðru sæti og Kristín Valdís Örnólfsdóttir í því þriðja. Vala Rún Magnúsdóttir, skautakona ársins 2013, keppti ekki vegna meiðsla.
Hörð barátta var í stúlknaflokki A. Emilía Rós Ómarsdóttir, frá Skautafélagi Akureyrar var hlutskörpust með 72,43 stig. Í öðru sæti var Marta María Jóhannsdóttir. Athygli vekur að Marta María er aðeins 11 ára gömul og er á fyrsta ári í þessum alþjóða flokki. Helga Karen Pedersen hafnaði í þriðja sæti.
Úrslit í A-flokkum urðu þessi:
Þuríður Björg Björgvinsdóttir, SB sigraði í Unglingaflokki A með 89,92 stig
Emilía Rós Ómarsdóttir, SA sigraði í Stúlknaflokki A með 72,48 stig
Ásdís Arna Fen Bergsveinsdóttir, SA sigraði í 12 ára og yngri A með 35,67 stig
Aníta Núr Magnúsdóttir, SB sigraði í 10 ára og yngri A með 25,48 stig
Ísold Fönn Vilhjálmsdóttir, SA sigraði í 8 ára og yngri A með 25,88 stig.
Úrslit í B-flokkum urðu þessi:
Elizabeth Tinna Arnardóttir, SB sigraði í Unglingaflokki B með 40.06 stig
Þórunn Glódís Gunnarsdóttir, SB sigraði í Stúlknaflokki B með 29.13 stig.
Þórunn Lovísa Löve, SB sigraði í 12 ára og yngri B með 22,50 stig
Kolfinna Ýr Birgisdóttir, SA, sigraði í 10 ára og yngri B með 20.98 stig
Matthildur Birta Sverrisdóttir, SB, sigraði í 8 ára og yngri B með 14.60 stig.