Bandaríski sundkappinn, Michael Phelps, var í nótt stöðvaður eftir að hafa ekið undir áhrifum áfengis og langt yfir hámarkshraða í úthverfi Maryland í Bandaríkjunum. Phelps var stöðvaður á jeppabifreið sinni á nærri tvöföldum hámarkshraða þar sem hraðast má aka á 45 mílum, eða rúmlega 70 km hraða.
Phelps, sem er sigursælasti sundmaðurinn í sögu Ólympíuleikanna, var að sögn lögreglu samvinnuþýðir og viðurkenndi brot sitt undanbragðalaust eftir að hafa verið færður til yfirheyrslu á lögreglustöð. Hann þarf að borga talsverða sekt fyrir athæfið.
Phelps var einnig gripinn glóðvolgur af lögreglu við akstur undiráhrifum áfengis fyrir 10 árum á svipuðum slóðum.