Ástralski landsliðsmaðurinn Phillip Hughes er látinn 25 ára að aldri. Hann fékk bolta á miklum hraða í höfuðið í krikket-leik fyrir tveimur dögum og komst aldrei til meðvitundar. Hann lést í dag á sjúkrahúsi í Sydney.
Hughes var borinn út á börum af leikvanginum í Sydney fyrir tveimur dögum eftir að boltinn hæfði hann í höfuðið í stað þess að lenda á hjálmi hans.
Í yfirlýsingu frá lækni liðsins, Peter Brukner, sem birt er bæði á BBC og Guardian, kemur fram að Hughes hafi látist fyrir skömmu. Hann hafi aldrei komist til meðvitundar í kjölfar þeirra áverka sem hann varð fyrir á þriðjudag. Hann hafi ekki kvalist og að fjölskylda hans og vinir hafi verið hjá honum á banabeðinu.
Hughes lék með South Australia og féll til jarðar á andlitið eftir að Sean Abbott, leikmaður New South Wales, sló boltann af krafti í hann.
Forsætisráðherra Ástralíu, Tony Abbott, minntist hans í morgun og lýsti honum sem ungum manni sem upplifði drauma sína. Andlát hans sé sorgardagur fyrir krikket og fjölskyldu hans. Það sem hafi gerst komi við hjartað á milljónum Ástrala.