Sævar Birgisson og Helga María Vilhjálmsdóttir eru skíðafólk ársins 2014 hjá Skíðasambandi Íslands.
Helga María átti gott ár og bætti punktastöða sína í öllum greinum sem telst frábært, en upp úr stendur að hún náði mjög góðum mótum í stórsvigi. Helga náði 2. sæti á móti í Norefjell þar sem hún fékk 28,23 punkta og svo 13. sæti og 27,92 punkta á móti í Hemsedal.
Hápunktur ársins hjá Helgu Maríu var þátttaka á Ólympíuleiknum í Sotsjí. Hún varð í 29. sæti í risasvigi, 46. sæti í stórsvigi og 34. sæti í svigi.
Helga María varð Íslandsmeistari í stórsvigi og samhliðasvigi, einnig sigraði hún á Icelandair Cup mótaröðinni.
Sævar náði þeim frábæra árangri á árinu að keppa fyrir hönd Íslands á Ólympíuleikunum í Sotsjí og er það í fyrsta skipti í 20 ár sem Ísland á skíðagöngumann á Ólympíuleikum. Árangur Sævars á leikunum var góður en hann varð í 72. sæti í sprettgöngu og 74. sæti í 15 km göngu. Sævar keppti á alþjóðlegum mótum víða erlendis auk þess að æfa af kappi á Íslandi, Ítalíu, Noregi og Svíþjóð. Sævar náði sínum besta árangri á ferlinum á World Cup móti í Toblach á Ítalíu í janúar. Sævar varð þar í 69. sæti aðeins 12 sekúndum á eftir fyrsta manni og fékk fyrir það 92 FIS punkta en lágmarkið fyrir Ólympíuleikana var 120 FIS punktar
Sævar varð einnig fimmfaldur Íslandsmeistari í skíðagöngu en hann sigraði í öllum einstaklings-greinar á Skíðamóti Íslands. Auk þess að verða Íslandsmeistari í 20 km skíðagöngu karla sem fram fór fyrr um veturinn. Sævar varð einnig bikarmeistari SKÍ á síðasta tímabili.