Segja má að Kolbeini Heði Gunnarssyni hafi verið hrint úr keppni í undanrásum 400 m hlaupsins á Evrópumeistaramótinu í Prag. Kolbeinn var á góðri siglingu eftir rétt rúmlega 200 metra þegar spænskur keppandi sem var við hlið hans hrinti honum út af brautinni. Kolbeinn hélt þó áfram en missti allan takt í hlaupinu og kom síðastur í mark í fjórða undanriðlinum á 49,21 sekúndu.
Kolbeinn hljóp afar kröftuglega fyrstu 200 metrana og var á góðu skriði þegar Spánverjinn Samuel García, viljandi eða óviljandi, slæmdi hendi sinni til Kolbeins með þeim afleiðingum að Kolbeinn sem var á innstu brautinni varð að stíga út fyrir brautina til þess að halda jafnvægi.
Tími Kolbeins var fyrir vikið langt frá Íslandsmetinu hans, 47,59.