Anton Sveinn McKee var í boðsundssveit Alabama-háskólans sem hafnaði í þriðja sæti í 400 jarda fjórsundi á bandaríska háskólameistaramótinu í gærkvöldi en mótið hófst í Iowa í gær. Þetta er í fyrsta sinn sem íslenskur karlmaður vinnur til verðlauna í sundkeppni bandaríska háskólameistaramótsins.
Á níunda áratug síðustu aldar vann Ragnheiður Runólfsdóttir til verðlauna í sundkeppni bandaríska háskólameistaramótsins.
Anton Sveinn synti bringusundshluta boðsundsins á 52,37 sekúndum.
Félagar Antons í sveitinni eru Connor Olsin, sem synti baksund, Brett Walsh synti flugsund og Kristian Gkolomeev synti skriðsund.
Anton Sveinn synti einnig 500 jarda skriðsund á 4.16,47 mínútum og hafnaði í 17. sæti, einu sæti frá keppnisrétti í B-úrslitum. Í dag syndir hann 100 jarda bringusund og á laugardag 200 jarda bringusund.