Alþjóðasundsambandið, FINA, hefur kveðið upp þann úrskurð að sjö keppendur frá Rússlandi verði ekki með á Ólympíuleikunum sem hefjast í Ríó 5. ágúst. Þessi ákvörðun er tekin vegna lyfjamisnotkunar Rússa.
Alþjóðaólympíunefndin, IOC, tilkynnti í gær að ákveðið hefði verið að fela heimssamböndunum í hverri íþróttagrein fyrir sig að taka ákvörðun um hvort rússneskir keppendur í þeirra grein fengju heimild til að keppa í Ríó.
Þeir sjö keppendur sem ekki fá keppnisleyfi í Ríó eru margir hverjir í fremstu röð. Nægir þar að nefna Juliu Efimovu sem vann bronsverðlaun á Ólympíuleikunum í London 2012 en Efimova er einnig margfaldur heims- og Evrópumeistari í 50, 100 og 200 metra bringusundi.
Auk Efimovu verða Mikhail Dovgalyuk, Natalia Lovtcova, Anastasia Krapivina, Nikita Lobintsev, Vladimir Morozov og Daria Ustinova fjarri góðu gamni í Ríó.
Þessar fréttir ættu að gefa íslensku sundfólki aukna möguleika í Ríó, ekki síst Hrafnhildi Lúthersdóttur sem vann til þrennra verðlauna í bringusundi á Evrópumótinu í London á þessu ári.
Hrafnhildur þarf a.m.k. ekki að hafa áhyggjur af hinni geysisterku Juliu Efimovu á leikunum.