Ráðstefna um félagslega hæfni

Verkefni sem gengur undir heitinu Sýnum karakter er nýjung í þjálfunar- og íþróttamálum á Íslandi, en verkefnið er samvinnuverkefni Ungmennafélags Íslands (UMFÍ) og Íþrótta- og Ólympíusambands Íslands (ÍSÍ).

Viðar Halldórsson lektor í félagsfræði við Háskóla Íslands, er ásamt Hafrúnu Kristjánsdóttur, íþróttasálfræðingi og lektor við Háskólann í Reykjavík, höfundur að verkefninu Sýnum karakter. Ráðstefna með sama heiti verður haldin í Háskólanum í Reykjavík laugardaginn 1. október næstkomandi. Ráðstefnan hefst klukkan 10:00 og stendur til klukkan 12:30.

Viðar hefur um nokkurra ára skeið þróað leiðarvísi fyrir þjálfara til að hlúa að og efla andlega og félagslega þætti hjá börnum og ungmennum.

„Árangur í íþróttum snýst ekki aðeins um líkamlega getu. Hann snýst líka um það að leikmenn þurfa að hafa gott hugarfar og vera góðir liðsmenn. Með markvissri þjálfun karaktera í börnum og ungmennum þá styrkjum við þau fyrir lífið, þátttöku í samfélaginu og aukum líka möguleika þeirra inni á íþróttavellinum,“ segir Viðar Halldórsson um verkefnið. 

Viðar segir mikla áherslu hafa verið lagða í þjálfun á líkamlegri færni og tækni og jafnvel sé búið að festa það í námskrám íþróttafélaga hvað eigi að læra og á hvaða ári. Þjálfun í hugarfari og félagsfærni sé hins vegar mjög tilviljanakennd.

„Það er vel hægt að þjálfa og styrkja leiðtogafærni eins og stökkkraft. Ef við gerum það með markvissum hætti þá náum við meiri árangri. Með þessu er íþróttahreyfingin bæði að sinna uppeldisþáttum starfsins og afreksþáttum starfsins,“ segir Viðar.

Á ráðstefnunni á laugardaginn mun íþróttafólk og þjálfarar halda erindi um ýmsar hliðar þjálfunar og ræða málin í pallborði. Ráðstefnugestir geta tekið þátt í umræðunum.

Þátttakendur á ráðstefnunni eru eftirtaldir:

Heimir Hallgrímsson, landsliðsþjálfari karlalandsliðs Íslands í knattspyrnu
Margrét Lára Viðarsdóttir, íþróttafræðingur, B.S. í sálfræði og landsliðskona í knattspyrnu
Vanda Sigurgeirsdóttir, lektor í tómstunda- og félagsmálafræðum við HÍ
Íris Mist Magnúsdóttir, íþróttafræðingur og landsliðsþjálfari í hópfimleikum
Dr. Hafrún Kristjánsdóttir, íþróttasálfræðingur og og lektor á íþróttasviði við HR
Dr. Viðar Halldórsson, lektor í félagsfræði við HÍ

Vefsíðan www.synumkarakter.is verður opnuð á ráðstefnunni en þar verða greinar og viðtöl við þjálfara og afreksíþróttafólk þar sem helsta umfjöllunarefni er efling andlegra og félagslegra þátta í gegnum þjálfun. Þjálfarar og íþróttafélög geta nýtt sér efnið á vefsíðunni. 

Hlekkur á skráningarsíðu ráðstefnunnar Sýnum karakter má finna hér: 

• Blogga um frétt