Eyþóra Þórsdóttir er komin í úrslit í fjölþraut og á tveimur einstökum áhöldum á Evrópumeistaramótinu í áhaldafimleikum sem fram fer í Cluj í Rúmeníu.
Eyþóra keppir sem fyrr fyrir hönd Hollands og tryggði sér sæti í úrslitum á jafnvægisslá og á gólfi. Samanlögð stig hennar, 54.598, skiluðu henni 5. sætinu í heildina eftir keppni dagsins.
Eyþóra hlaut 13.466 stig í stökki og 13.544 stig fyrir tvíslá. Á jafnvægisslá náði hún þriðju hæstu einkunn, 14.233 stigum, og á gólfi var hún með fimmtu hæstu einkunnina eða 13.366 stig.
Eyþóra var valin bjartasta vonin eða efnilegasti íþróttamaður Hollands árið 2016 á uppskeruhátíð hollenska íþróttasambandsins í fyrra. Hún á íslenska foreldra en er fædd og uppalin í Hollandi. Hún varð í 7. sæti með hollenska landsliðinu á Ólympíuleikunum í Ríó og hafnaði í 9. sæti í fjölþraut.