Íþróttir | Golf | mbl | 31.7.2015 | 9:43

Einvígið á Nesinu á mánudaginn

Signý Arnórsdóttir nýkrýndur Íslandsmeistari verður meðal þátttakenda í Einvíginu á Nesinu á mánudaginn kemur. mbl.is / Styrmir Kári

Árlegt góðgerðarmót Nesklúbbsins og DHL Express á Íslandi, Einvígið á Nesinu, verður nú haldið í 19. skipti á Nesvellinum mánudaginn 3. ágúst næstkomandi. Venju samkvæmt er 10 af bestu kylfingum landsins boðið til leiks og munu þau í ár spila í þágu barna og unglingageðdeildar Landspítalans (BUGL).

Mótið verður með hefðbundnu sniði, þ.e. klukkan 10.00 leika keppendur 9 holu höggleik og kl. 13.00 hefst svo Einvígið. Einn kylfingur dettur út á hverri holu, þar til tveir berjast um sigurinn á 18. holu.

DHL Express á Íslandi hefur verið styrktaraðili mótsins frá því að það var fyrst haldið árið 1997 og ávallt styrkt félög eða samtök sem láta sér hag barna varða. Í ár er það BUGL, barna og unglingadeild Landspítalans, sem nýtur góðs af og fær eina milljón króna frá DHL. BUGL sérhæfir sig í greiningu og meðferð á geðröskunum barna og unglinga með það að leiðarljósi að stuðla að auknum lífsgæðum þeirra og fjölskyldna þeirra.

Þátttakendur í ár eru Aron Snær Júlíusson, Birgir Leifur Hafþórsson, Björgvin Sigurbergsson, Helga Kristín Einarsdóttir, Hlynur Geir Hjartarson, Ólafur Björn Loftsson, Ragnhildur Sigurðardóttir, Signý Arnórsdóttir, Stefán Már Stefánsson og Þórður Rafn Gissurarson.