Kylfingarnir Andri Þór Björnsson, GR, og Axel Bóasson, GK, tryggðu sér um helgina fullan keppnisrétt í Nordic Golf-mótaröðinni í golfi.
Það var ljóst eftir að þeir höfnuðu á meðal 25 efstu kylfinga á lokaúrtökumóti fyrir mótaröðina sem fram fór í Danmörku.
Andri Þór var í öðru sæti fyrir lokahringinn, sem hann spilaði á 74 höggum eða tveimur yfir pari. Hann endaði því samanlagt á tveimur höggum undir pari og endaði í fjórða sæti mótsins. Axel tryggði sér fullan keppnisrétt eftir að hafa spilað lokahringinn á einu höggi undir pari, 71 höggi. Hann endaði samtals á pari eftir hringina þrjá og endaði í tíunda sæti. Hann lék á mótaröðinni í ár en þurfti að fara í gegnum úrtökumót til að öðlast þar keppnisrétt á ný.
Haraldur Franklín Magnús, GR, náði ekki að tryggja sér fullan keppnisrétt í mótaröðinni. Hann hafnaði í 51. sæti, spilaði lokahringinn á tveimur höggum yfir pari og hringina þrjá samtals á tíu höggum yfir pari.