„Aðstæður í dag voru frábærar. Það er samt alltaf svolítið skrítið að hita upp í myrkri og það birtir ekkert fyrr en 15 mínútum fyrir rástímann. Dagurinn var mjög góður, mér leið vel í morgun og ég var að spila mjög vel,“ segir Ólafía Þórunn Kristinsdóttir atvinnukylfingur í samtali við netmiðilinn kylfingur.is en Ólafía Þórunn lék fyrsta hringinn á Opna ástralska mótinu í golfi í Adelaide á 72 höggum og er í 41.-61. sæti.
„Mér fannst ég spila aðeins betur en skorið sagði, til að mynda þá hitti ég tvö grín á par 5 holum í tveimur höggum og ég rétt missti örninn á annarri. Það voru bara tvö slæm högg í dag, tvær holur í röð þar sem ég var að slá með 5 járni, og þessi högg kostuðu mig. En heilt yfir er ég mjög sátt með daginn,“ segir Ólafía við kylfingur.is.
Ólafía fer seinna af stað á öðrum hring en hún hefur þar keppni næstu nótt um klukkan 1.30. Keppendur eru 144 og um það bil 70 þeirra halda áfram eftir niðurskurðinn að loknum öðrum hring.