Sjónvarpsáhorfandi kom upp um svindl

Kylfingurinn Lexi Thompson var gráti næst eftir að hafa tapað í bráðabana á fyrsta risamóti ársins, ANA Inspiration. Það sem meira er, það er allt vegna sjónvarpsáhorfanda.

Thompson gerði sig seka um að koma merktum bolta rangt fyrir á hringnum á laugardag og sjónvarpsáhorfandi kom skilaboðum um það áleiðis til dómara. Á því augnabliki var hún langt komin á síðasta hringnum í gær og hafði tveggja högga forystu á mótinu, en fékk fyrir vikið fjögur högg í víti.

Það sem Thompson gerði er að þegar hún merkti bolta sinn á flöt setti hún merkinguna við hlið boltans. Þegar hún svo kom boltanum aftur fyrir í púttinu setti hún hann niður fyrir framan merkið, en ekki við hliðina eins og hún hefði átt að gera.

Að lokum fór hún í bráðabana við So Yeon Ryu, sem vann um leið sinn annan risatitil. Thompson var eyðilögð, en hún sagðist hafa gert mistök sem hún vissi ekki af.

• Blogga um frétt