Lögreglan í Flórída hefur birt myndskeið af handtöku kylfingsins Tiger Woods þegar hún kom að honum sofandi í bifreið hans aðfaranótt þriðjudags.
Tiger fannst steinsofandi undir stýri með bílinn í gangi og var staðsettur þar sem ólöglegt er að leggja. Í framhaldinu var hann handtekinn og settur í varðhald í fjóra klukkutíma.
Lögreglan hefur sagt að Tiger hafi verið í svo annarlegu ástandi að hann hafi ekki vitað hvar hann var staddur. Fyrstu fréttir hermdu að kylfingurinn hafi verið undir áhrifum áfengis. Hann neitaði því og heldur því fram að líkami hans hafi brugðist við lyfjum á þennan hátt.
Blóðprufa var tekin úr Tiger og mun hún væntanlega varpa ljósi á málið en á meðfylgjandi myndskeiði má sjá þegar lögreglan ræðir við Tiger Woods og óhætt er að segja að hann hafi verið í annarlegu ástandi.