Birgir Leifur Hafþórsson, kylfingur úr GKG, er úr leik á Foshan-mótinu í Kína, sem er hluti af Áskorendamótaröð Evrópu, eftir tvo hringi. Birgir lék á 77 höggum eða fimm höggum yfir pari í gær, en bætti leik sinn til muna og spilaði á einu höggi undir pari í dag, 71 höggi. Það dugði hins vegar ekki til og var hann fjórum höggum frá því að komast í gegnum niðurskurðinn.
Mótið var mikilvægt fyrir Birgi í baráttunni um að komast í hóp 15 stigahæstu kylfinga mótaraðarinnar, sem myndi færa honum keppnisrétt á Evrópumótaröðinni. Hann er í 26. sæti fyrir mótið sem er það þriðja síðasta í mótaröðinni.