Atvinnukylfingurinn Birgir Leifur Hafþórsson náði sér alls ekki á strik á öðrum degi Opna Joburg-mótsins sem fram fer í Suður-Afríku. Birgir lék á 79 höggum eða sjö höggum yfir pari og er hann því úr leik.
Birgir fékk níu skolla, tvo fugla og sjö pör í dag. Hann lék á 70 höggum í gær, eða einu höggi undir pari, og lýkur hann því leik á samtals sex höggum yfir pari.
Þetta er annað mót ársins í Evrópumótaröðinni hjá Skagamanninum. Um síðustu helgi endaði hann í 62. sæti á ástralska PGA-meistaramótinu á samtals þremur höggum yfir pari.