Kvennalið Fram í handknattleik hefur samið við argentínska landsliðsmarkvörðinn Nadiu Bordon um að leika með liðinu í Olís-deild kvenna. Samningur Bordon við Fram er til tveggja ára.
Bordon er 26 ára og á að baki 40 landsleiki fyrir Argentínu auk þess að hafa spilað með yngri landsliðum þjóðarinnar. Hún hefur síðustu ár leikið með S.A. Quilmes í heimalandinu en einnig leikið á Ítalíu.
Nadia Bordon fyllir skarð Sunnevu Einarsdóttur sem varði mark Fram á síðustu leiktíð. Sunneva mun leika í Noregi á næstu leiktíð.