Keppni í Olís-deild karla í handbolta hefst annað kvöld með fjórum leikjum. Meðal leikja er viðureign Fram og Hauka á heimavelli Fram í Safamýri. Haukum er spáð 2. sætinu í deildinni í vetur, en Fram 8. sætinu.
Framarar vilja greinilega fá góðan stuðning í leiknum annað kvöld og byrja leiktíðina af krafti, því í auglýsingu Fram fyrir leikinn á morgun er sérstaklega tekið fram að þeir sem mæti í bláu í Safamýrina annað kvöld fái frítt á leikinn.
Leikur Hauka og Fram í 1. umferð Olís-deildar karla hefst klukkan 19.30 annað kvöld. Á sama tíma mætast Afturelding og Stjarnan í nýliðaslag í Mosfellsbæ, ÍR tekur á móti Val og Akureyri sækir HK-inga heim.