Gunnar Magnússon, þjálfari Eyjamanna, sagði að það eina neikvæða eftir sigurinn á Valsmönnum í kvöld væri að nú væri komið jólafrí í handboltanum og ekki spilað aftur fyrr en í febrúar.
Eyjamenn hafa verið á góðum skriði síðustu vikur og unnu í kvöld sannfærandi sigur á toppliði Vals, 26:19, í Olís-deild karla.
Gunnar sagði við mbl.is að eftir mikla vinnu undanfarnar vikur hefði vörnin smollið vel saman í síðustu leikjum og hún væri að skila þessum stigum. Ekki væri verra þegar markvarslan fylgdi í kjölfarið eins og í kvöld.
Hann verður ekki með liðinu í janúar vegna starfa sinna með landsliði Íslands á HM í Katar en sagði að sínir menn myndu eftir sem áður vinna mjög vel - þessi sigur væri góð hvatning til þess að gera enn betur og koma sterkir til leiks í febrúar.
Viðtalið í heild má sjá á meðfylgjandi myndskeiði.