Hannes Karlsson, formaður Akureyrar handboltafélags, segir ekkert hæft í að til standi að slíta samstarfi KA og Þórs um sameiginlegan rekstur handboltafélagsins en orðrómur hefur verið um hugsanleg slit.
„Það var síðast fundur hjá okkur í gær og þar lék allt í lyndi,“ sagði Hannes í samtali við Morgunblaðið og bætti við: „Enda væri engin skynsemi í að slíta samstarfinu.“
Spurður hvort til stæði að flytja heimaleik Akureyrar úr íþróttahöllinni yfir í KA-heimili sagði Hannes: „Það er til skoðunar eins og allt í rekstrinum.“