Markvörðurinn Grétar Ari Guðjónsson leikur að öllum líkindum með nýliðum Selfoss í Olís-deild karla í handbolta á næstu leiktíð.
Grétar Ari, sem verður tvítugur í næsta mánuði, hefur að mestu leyti verið varamarkvörður hjá Haukum en Giedrius Morkunas er aðalmarkvörður Íslandsmeistaranna úr Hafnarfirði. Grétar lék þó stórt hlutverk þegar Haukar höfðu betur gegn Aftureldingu, 3:2, í úrslitaeinvígi liðanna um Íslandsmeistaratitilinn.
Gangi samningar eftir mun Grétar verða lánaður til Selfyssinga en í samtali við mbl.is sagði hann að ekkert væri staðfest en líklegt væri að af skiptunum yrði.
Áður höfðu skytturnar Árni Steinn Steinþórsson og Einar Sverrisson gengið til liðs við nýliðana og samkvæmt heimildum mbl.is hefur Hvolsvellingurinn Guðni Ingvarsson einnig ákveðið að semja við Selfoss.