Nýliðar Selfoss styrkjast frekar

Selfyssingar hafa fengið góðan liðsstyrk eftir að þeir tryggðu sér sæti að nýju í efstu deild karla í handbolta nú í vor. Skytturnar Árni Steinn Steinþórsson og Einar Sverrisson ákváðu að snúa heim, og nú hefur Hvolsvellingurinn Guðni Ingvarsson ákveðið að semja við Selfoss, samkvæmt heimildum Morgunblaðsins.

Guðni, sem er 29 ára gamall línumaður, varð Íslandsmeistari með ÍBV árið 2014 og bikarmeistari í fyrra. Hann lék svo með Gróttu í vetur og hafnaði í fimmta sæti með liðinu í Olís-deildinni.

Selfoss komst upp í Olís-deildina með sigri á Fjölni í fimm leikja umspili í vor.