Dagur Sigurðsson mun tvöfalda laun sín ef hann tekur tilboði frá franska meistaraliðinu Paris Saint-Germain, en samkvæmt heimildum þýska netmiðilsins Sport1.de hefur Parísarfélagið gert Degi tilboð um að taka við þjálfun liðsins á næstu leiktíð.
Eins og fram kom í þýska tímaritinu Handball Inside í gær mun Dagur nýta sér ákvæði í samningi sínum við þýska handknattleikssambandið og hætta sem þjálfari karlalandsliðs Þýskalands næsta sumar.
Króatinn Noka Serdarusic er þjálfari Paris SG en samningur hans rennur út eftir tímabilið og vilja forráðamenn félagsins fá Dag til að taka við starfi hans. Sport1.de greinir frá því að Dagur muni fá 600 þúsund evrur í árslaun hjá franska liðinu, en sú upphæð jafngildir tæpum 75 milljónum króna. Þetta er tvöföld sú upphæð sem hann fær fyrir að stýra þýska landsliðinu.